काठमाडौं। प्रधानमन्त्री पुष्पकमल दाहाल ‘प्रचण्ड’ ले एमाले(माओवादीसहितको गठबन्धन पूरै अवधि जाने दाबी गरेका छन्।
धनगढी एयरपोर्टमा सञ्चारकर्मीसँग कुरा गर्दै उनले बाहिर बजारमा गठबन्धन लामो समय नटिक्ने भन्दै भइरहेका चर्चा–परिचर्चालाई अस्वीकार गरे । ‘बाहिर बजारमा विभिन्न चर्चा परिचर्चा भएपनि त्यस्तो केही छैन । पूरै अवधि जान्छ अहिलेको समीकरण ।’
प्रधानमन्त्री प्रचण्डले स्थिरतातर्फ सरकार अघि बढेको पनि दाबी गरे । अहिलेको सत्ता गठबन्धनलाई वामपन्थी एकता नभई सत्ता समीकरणको रूपमा लिइएको प्रधानमन्त्रीले बताए । । तर, समझदारी राम्रो बन्दै गए वाम एकताको सम्भावना रहेको उनले बताए ।
‘समीकरण वामपन्थीको मात्र गरेको हैन, वाम एकता भन्नु सही पनि छैन, वाम गैरवाम सबै छन् । यसलाई सत्ता समीकरणको रूपमा लिएका छौं । राम्रो काम हुँदै गयो, छलफल हुँदै गयो, समझदारी राम्रो बन्दै गयो भने वामपन्थी विचार मिल्ने एक ठाउँमा हुने सम्भावना बढ्दै जान्छ । अहिले वामपन्थी एकता होइन, राजनीतिक सत्ता समीकरणको रूपमा मात्र हेरौं’, प्रधानमन्त्रीले भने ।