काठमाडौं । कर्णाली प्रदेशका मुख्यमन्त्री यामलाल कंडेलले आज विश्वासको मत लिँदैछन् । त्यसका लागि कर्णाली प्रदेश सभाको बैठक आज दिउँसो ३ बस्दै छ ।मुख्यमन्त्री कंडेलले विश्वासको मत लिन दिउँसो तीन बजे प्रदेश सभाको बैठक बोलाइएको छ ।
४० सदस्यीय कर्णाली प्रदेशसभामा नेपाली कांग्रेसका १४, नेकपा माओवादी केन्द्रका १३, नेकपा एमालेका १० जना सांसद छन् । यसैगरी राप्रपा, एकीकृत समाजवादी र स्वतन्त्रका एक–एक सांसद छन् । नेकपा एमाले र माओवादी केन्द्रको मात्रै संख्या जोड्दा पनि मुख्यमन्त्री कंडेलले विश्वासको मत पाउँछन् ।
नेकपा एमालेका कंडेल गत चैत २७ गते मुख्यमन्त्री नियुक्त भएका थिए । तर मन्त्रालय भागबण्डामा कुरा नमिल्दा सरकार पूर्ण हुन सकेको छैन । मुख्यमन्त्री कंडेलले बुधबार मात्रै नेकपा माओवादी केन्द्रका रणसिंह परियारलाई विनाविभागीय मन्त्री नियुक्त गरेका थिए ।
बुधबार नेकपा एमाले र नेकपा माओवादी केन्द्रका नेताहरुको बैठकले मन्त्रालय भागबण्डा भने टुंगो लगाएको थियो । बैठकमा भएको सहमतिअनुसार नेकपा एमालेले भौतिक पूर्वाधार तथा सहरी विकास, आन्तरिक मामिला र भूमि व्यवस्था र कृषि तथा सहकारी मन्त्रालय पाउने छ ।
यस्तै माओवादी केन्द्रले आर्थिक मामिला तथा योजना, सामाजिक विकास, उद्योग, पर्यटन, वन तथा वातावरण मन्त्रालय र जलस्रोत तथा ऊर्जा विकास मन्त्रालय पाउने छ ।
