काठमाडौं । युएईविरुद्धको दोस्रो टि-२० आईमा नेपाल ८ विकेटले विजयी भएको छ । कीर्तिपुरमा १ सय २९ रनको लक्ष्य नेपालले १५ ओभर ५ बलमा मात्र २ विकेट गुमाएर पुरा गर्यो । योसँगै २ खेलको सिरिज १-१ को बराबरीमा टुंगिएको छ ।
यसअघि सोमबार भएको पहिलो खेलमा यूएईले नेपाललाई ६ विकेटले पराजित गरेको थियो । नेपालका लागि कुशल भुर्तेलले आक्रामक र उत्कृष्ट ब्याटिङ गरे । उनी ८४ रनमा नटआउट रहे । उनले ५७ बलमा १२ चौका र २ छक्का हाने । यस्तै कप्तान दीपेन्द्रसिंह ऐरीले १७ बलमा नटआउट २३ रन बनाए ।
नेपाललले आज उत्कृष्ट शुरुवात गर्यो । नेपालका लागि ओपन गर्दै कुशल भुर्तेल र कुशल मल्लले पहिलो पावर प्लेमा विना क्षति ५१ रन जोडे । ३४ रनमा जीवनदान पाएको फाइदा उठाउँदै भूर्तेलले ८४ रन बनाए । ट्वान्टी–२० अन्तर्राष्ट्रियमा यो उनको १४ औं अर्धशतक हो । उनी नेपालबाट ट्वान्टी–२० अन्तर्राष्ट्रियमा सर्वाधिक अर्धशतक बनाउने खेलाडी हुन् । ओपनर कुशल मल्लले १७ बलमा २ छक्का र एक चौकासहित १९ रन जोडे । वान डाउन मौका पाएका डेबुडेन्ट सन्तोष यादव १ रन जोडेर आउट भए ।
बलिङमा युएईका मोहम्मद अरफान र निलंश केसवानीले एकएक विकेट लिए । यसअघि कीर्तिपुरमा टस हारेर पहिले ब्याटिङ गरेको पाहुना टोलीले निर्धारित २० ओभरमा ८ विकेट गुमाउँदै १ सय २८ रन बनाएकाे थियाे ।
युएईका लागि अक्षदीप नाथले अर्धशतक बनाए । ४८ रन जोड्दा ६ विकेट गुमाएर संकटमा पुगेको यूएईको ब्याटिङ अक्षदीप र मोहम्मद अरफानको जोडीले सम्हाल्यो । झेदारीले उकासेको थियो ।
नाथ र अरफानले सातौं विकेटका लागि ६४ रनको साझेदारी गरे । नाथ ५३ रनमा नटआउट रहँदा अरफान ३२ रनमा आउट भए । अदीब उसमानी ३०,अलीशान शराफू १, हरप्रीत सिंह भाटिया १ रनमा आउट भए । कप्तान मोहम्मद वासिम, शोएब खान, निलंश केसवानी र खुजाइमा तनभीरले खाता खोल्न सकेनन् ।
सन्दीपले ४ ओभरमा १ मेडन राख्दै ६ रन खर्चेर ३ विकेट लिए । हेमन्त धामीले ४ ओभरमा २० रन खर्चेर २ विकेट लिए । नन्दन र शाहवले १–१ विकेट लिए । नन्दनले ४ ओभरमा ४४ र शाहवले ३ ओभरमा २९ रन खर्चे । सन्तोषले १ ओभर बलिङ गर्दै ११ रन खर्चे ।
