काठमाडौं । सम्पत्ति शुद्धीकरण एवं सङ्गठित अपराधको अभियोग संशोधन हुने भएपछि राष्ट्रिय स्वतन्त्र पार्टीका सभापति रवि लामिछानेले खुशी व्यक्त गरेका छन् ।
जिल्ला अदालत कास्कीले सम्पत्ति शुद्धीकरण एवं सङ्गठित अपराधको अभियोग संशोधन गरेपछि उनले सञ्चारकर्मीलाई खुशी लागेको प्रक्रिया दिएका हुन् ।
‘मैले आदेश पढ्न पाएको त छैन । अदालतकै आदेशमा हामी चल्नु पर्ने हुन्छ’, सभापति लामिछानेले सञ्चारकर्मीसँग भने, ‘म खुशी छु यसमा ।’
तर अन्य जिल्लाहरूमा आफूविरूका मुद्दाहरू अझै बाँकी रहेकोे लडाईं, पनि बाँकी रहेको उनले बताए । ‘लडाइँ त मेरो अझै पनि बाँकी छ । अन्य जिल्लाहरू पनि जानु पर्ने छ,’ सभापति लामिछानेले भने, ‘एउटा जिल्लाबाट न भर्खर भएको हो । कास्कीबाट भएको थाहा पाएको छु । खुशी छु ।’
जिल्ला अदालत कास्कीका न्यायाधीश हिमलाल बेल्बासेको इजलासले शुक्रबार जारी गरेको आदेशमा भनिएको छ, ‘निवेदन मनासिव देखिँदा सम्बन्धित मूल, थप र पूरक अभियोगपत्रहरूमा सहकारी ठगीको अभियोग दाबी कायम राखी अन्य सङ्गठित अपराध र सम्पत्ति शुद्धीकरणसमेतको अभियोग नरहने गरी मुलुकी फौजदारी कार्यविधि संहिता, २०७४ को दफा ३६ बमोजिम संशोधन गरिदिएको छ ।’
अब कास्कीमा रवि लामिछानेमाथि सहकारी ठगीको अभियोग मात्र बाँकी छ ।
