काठमाडौं । गुजरात टाइटन्सलाई ९२ रनले हराउँदै साविक विजेता रोयल च्यालेन्जर्स बैंगलोर (आरसिबी) लगातार दोस्रो पटक इन्डियन प्रिमियर लिग (आईपीएल)को फाइनलमा प्रवेश गरेको छ ।
धर्मशालामा मंगलबार राति टस हारेर पहिले ब्याटिङ गर्दै २ सय ५४ रनको विशाल स्कोर खडा गरेको आरसीबीले गुजरातलाई १९.३ ओभरमा १ सय ६२ रनमै अलआउट गर्यो ।
खराब शुरुवात गरेको गुजरात शुभमन गिल, साई सुदर्शन र जोस बटलरजस्ता प्रमुख ब्याटर छिट्टै आउट भएपछि दबाबमा पर्यो खेलमा फर्किन सकेन । राहुल तेवतियाले ६८ रन बनाए पनि टोलीलाई हारबाट जोगाउन सकेनन्।
आरसिबीका बलरहरूले उत्कृष्ट प्रदर्शन गरे। जेकब डफीले ३ विकेट लिए भने भुवनेश्वर कुमार र क्रुनाल पाण्ड्याले समान २ विकेट हात पारे। जोश हेजलवुड र रसिख सलामले पनि महत्वपूर्ण विकेट लिए।
आरसीबीले विशाल स्कोर खडा गर्दा कप्तान रजत पाटीदारले नटआउट ९३ रनको विस्फोटक इनिङ्स खेले। उनले केवल ३३ बलमा ९ छक्का र ५ चौका प्रहार गरे।
विराट कोहलीले २५ बलमा ४३, देवदत्त पडिक्कलले १९ बलमा ३० र क्रुनाल पाण्ड्याले २८ बलमा ४३ रन जोडे। वेंकटेश अय्यरले सुरुआतमा ७ बलमा १९ रन बनाए । आरसिबीले अन्तिम ६ ओभरमा १ सय १४ रन जोड्यो । गुजरातका लागि जेसन होल्डर र कागिसो रबाडाले समान २ विकेट लिए।
गुजरातले शीर्ष दुईमा रहेर लिग चरण सकाएकाले अब दोस्रो क्वालिफायर खेल्ने मौका पाउनेछ। उसले सनराइजर्स हैदराबाद र राजस्थान रोयल्सबीचको एलिमिनेटर विजेतासँग प्रतिस्पर्धा गर्नेछ।
