काठमाडौं । चीनसँग पराजित भएपछि नेपाली राष्ट्रिय महिला क्रिकेट टोलीको एसियन गेम्स खेल्ने सपना अधुरो रहेको छ ।
एसियन छनोटअन्तर्गत तेस्रो स्थानका लागि आइतबार बिहान मलेसियाको वायोमास ओभलमा भएको खेलमा नेपाल चीनसँग डीएलएस मेथडमा ५ विकेटले पराजित भयो ।
योसँगै नेपाली महिला क्रिकेट टोलीले जापानमा हुने एसियन गेम्समा छनोट हुने अन्तिम मौका पनि गुमायो । नेपाललाई पराजित गरेसँगै चीनले एसियन गेम्समा स्थान बनाएको छ।
वर्षाका कारण खेल ७ ओभरमा छोट्याइएको खेलमा नेपालले ७ ओभरमा ५ विकेट गुमाएर ५० रनको योगफल तयार पारेको थियो।
डीएल मेथडमा चीनले ४३ रनको नयाँ लक्ष्य पाएको थियो। जुन लक्ष्य चीनले निर्धारित ७ ओभरमा ५ विकेटको क्षतिमा पुरा गर्यो ।
एसियन खेलकुदमा स्थान बनाउन अन्तिम बलमा २ रन आवश्यक परेको खेलमा काई युझीले चौका प्रहार गर्दै चीनलाई जिताइन ।
मिङयु झुले बनाएको १८ रन नै चीनका लागि सर्वाधिक रह्यो। नेपालकी रिया शर्माले २ विकेट लिइन्। २ खेलाडी रन आउट हुन पुगे।
त्यसअघि चीनले टस जितेर फिल्डिङ रोजेपछि ब्याटिङ गरेको नेपालले निर्धारित ७ ओभरमा ५ विकेटको क्षतिमा ५० रन बनाएको थियो ।
तेस्रो ओभरको खेल जारी रहँदा पानी परेपछि खेल ७ ओभरमा छोट्टाइएको थियो।
नेपालका लागि कविता कुवँर २२ र रुविना क्षेत्री ३ रनमा नटआउट रहे। कविताले १० बलमा १ चौका र १ छक्का प्रहार गरिन्।
कप्तान इन्दु बर्मा ११ रनमा आउट भईन् । सम्झना खड्का ५ र उपकप्तान पुजा महतो १ रनमा आउट भए । सोनी पाख्रिन ५ रनमा रिटायर्ट आउट भइन्।
