काठमाडौं । नेकपा एमालेका नेता विजय सुब्बाले अहिलेकै अवस्था रहेमा पार्टीको मृत्यु पर्खनुको विकल्प नभएको बताएका छन् । पार्टीभित्र समस्या बढ्दै गएकोमा चिन्ता गर्दै सुब्बाले सामाजिक सञ्जालमार्फत हैरानी व्यक्त गरेका हुन् ।
उनले असल नियतका नेताहरूलाई नेतृत्वमा नलाने हो भने पार्टीको मृत्यु पर्खनुको विकल्प नरहेको बताएका हुन् ।
‘आदरणीय पार्टीका निष्ठावान् कमरेडहरू, म पार्टी निर्माण अभियानमा त्यसै हारेको हैन,’ उनले लेखका छन्, ‘पार्टीलाई जलाइरहेका तमाम गैर कम्युनिष्ट विकृति र विसङ्गति तत्काल सच्याउनुपर्छ भनि मूख्य सबै नेताहरूमा कडा रूपमा पटक–पटक राखेँ, पार्टीका विधान महाधिवेशनदेखि लिएर विभिन्न तहका अधिवेशनहरूमा प्रष्ट भाषामा राखेँ तर ममाथि पार्टी विरोधी भाषण गरेको भनियो ।’
पार्टी भित्रका गलत गतिविधि सच्च्याउनेतर्फ ध्यान जानु त कता हो कता चाकरीबाजहरूको नेता खुशी पार्ने प्रवृति रहेको भन्दै उनले आखिर सबै समस्या थुप्रिएर अहिलेको हालतमा पुगेको सबैले थाहा पाउँदैछन् भनेर लेखेका छन् ।
