काठमाडौं । नवप्रवेशी जोर्डन अल्जेरियासँग पराजित हुँदै फिफा विश्वकप २०२६ को समूह चरणबाटै बाहिरिएको छ ।
अमेरिकाको सन फ्रान्सिस्को बे एरेना स्टेडियममा मंगलबार भएको खेलमा जोर्डन अल्जेरियासँग २–१ ले पराजित हुँदै विश्वकपबाट बाहिरिएको हो । अग्रता जोगाउन नसक्दा जोर्डन बाहिरिन बाध्य भयो । खेलको ३६औं मिनेटमा गोल गर्दै जोर्डनले अग्रता लिएको थियो । निजार अल रशदानले गोल गर्दै जोर्डनलाई अग्रता दिलाएका थिए । तर त्यसको ३३ मिनेटपछि अल्जेरियाले बराबरी गोल फर्कायो ।
६९औं मिनेटमा रियाद महरेजको क्रसमा नाधीर बेनबोउलीले गोल गर्दै अल्जेरियालाई बराबरीमा फर्काए । ८२औं मिनेटमा अमाइन गौइरीले गोल गर्दे अल्जेरियालाई अग्रता दिलाए । त्यसपछि दुवैतर्फबाट गोल हुन सकेन र अल्जेरिया विजयी भयो ।
अल्जेरियाले पहिलो जित निकाल्दै नकआउट चरणमा पुग्ने सम्भावना कायमै राखेको छ । समूह ‘जे’ मा अल्जेरिया ३ अंक जोड्दै तेस्रो स्थानमा छ ।
समान ३ अंक जोडेको अष्ट्रिया दोस्रो स्थानमा छ । २ खेलबाट ६ अंक जोडेको साविक विजेता अर्जेन्टिना शीर्ष स्थानमा छ । पहिलोपटक विश्वकप खेलेको जोर्डन अंकविहीन छ । अब यो समूहमा अष्ट्रिया र अल्जेरियामध्ये एक टोली नकआउट चरण जानेछ । र यीबिचको खेलले त्यसको टुंगो लाग्नेछ । अर्को खेलमा नकआउट चरण पुगिसकेको अर्जेन्टिना र बाहिरिसकेको जोर्डन भीड्नेछन् ।
