काठमाडौं । साविक विजेता अर्जेन्टिना विश्वकपको क्वार्टरफाइनलमा प्रवेश गरेको छ । संघर्षपूर्ण खेलमा इजिप्टलाई ३ -२ ले हराउँदै अर्जेन्टिना अन्तिम आठमा प्रवेश गरेको हो ।
७९ मिनेटसम्म २–० ले पछाडि परेको अवस्थाबाट पुनरागमन गर्दै अर्जेन्टिनाले ३–२ को शानदार जित हासिल गर्यो ।
खेलको पहिलो हाफको १५ औँ मिनेटमा इजिप्टले अग्रता लिएको थियो । यासिर इब्राहिमले गोल गर्दै टोलीलाई अग्रता दिलाएका थिए ।
पहिलो हाफको १९ औँ मिनेटमा अर्जेन्टिनाले पेनाल्टीको मौका पाएको थियो । लियोनल मेस्सी चुक्दा पहिलो हाफमा अर्जेन्टिना गोलविहीन बन्यो ।
दोस्रो हाफको ५७ औँ मिनेटमा इजिप्टका मोस्ताफा जिकोले गोल गरे । भीएआर परीक्षणबाट इजिप्टले त्यसअघि फाउल गरेको देखाएसँगै गोलले मान्यता पाएन । त्यसपछि उनले ६६ औँ मिनेटमा गोल गर्दै नतिजा २-० को स्थितिमा ल्याए ।
खेलको ७९ औँ मिनेटसम्म अर्जेन्टिना २-० ले पछि परेको थियो । ७९ औँ मिनेटमै अर्जेन्टिनाका क्रिष्टिन रोमेरोले अर्जेन्टिनाका लागि पहिलो गोल गरे ।
८३ औँ मिनेटमा लियोनल मेस्सीले गोल गर्दै खेललाई बराबरीको स्थितिमा ल्याए । दोस्रो हाफको इन्जुरी समयको ९२ औँ मिनेटमा इन्जो फर्नान्डिजले गोल गर्दै खेल अर्जेन्टिनाको पक्षमा ल्याए ।
क्वाटरफाइनलमा अर्जेन्टिनाले स्विट्जरल्याण्ड र कोलम्बोबीचको खेलबाट तय हुने विजेतासँग खेल्नेछ ।
