काठमाडौं । फिफा विश्वकप–२०२६ को पहिलो सेमिफाइनलमा उपाधिका प्रमुख दाबेदार फ्रान्स र स्पेन आमनेसामने हुँदै छन् ।
विश्व फुटबलका यी दुई युरोपेली महाशक्तिबीचको खेल अमेरिकाको ड्यालस स्टेडियममा नेपाली समयअनुसार, मंगलबार राति १२ बजेर ४५ मिनेटमा सुरु हुनेछ । दुवै टोलीमा विश्वस्तरीय खेलाडीहरूको उपस्थिति रहेकाले खेल उच्च प्रतिस्पर्धात्मक हुने अपेक्षा गरिएको छ।
फ्रान्सले क्वार्टरफाइनलमा मोरक्कोलाई २–० ले पराजित गर्दै सेमिफाइनलमा स्थान बनाएको थियो। प्रतियोगिताभर सन्तुलित आक्रमण र मजबुत रक्षात्मक प्रदर्शन गरेको फ्रान्स लगातार अर्को विश्वकप फाइनल पुग्ने लक्ष्यमा छ।
यता स्पेनले क्वार्टरफाइनलमा बेल्जियमलाई २–१ ले हराउँदै अन्तिम चारमा स्थान सुरक्षित गरेको हो। युवा खेलाडीको प्रदर्शन, प्रभावशाली मिडफिल्ड र बल नियन्त्रणमा आधारित खेलशैली स्पेनको मुख्य शक्ति हाे ।
प्रतियोगिताको सबैभन्दा बलियो रक्षापंक्ति भएको स्पेनको सामना एम्बाप्पे, उस्मान डेम्बेले र माइकल ओलिसे रहेको फ्रान्सको शक्तिशाली फरवार्ड लाइनसँग हुनेछ ।
हेड टू हेडमा स्पेन हावी
हेड–टु–हेड तथ्यांकमा स्पेन फ्रान्सभन्दा केही अघि देखिन्छ । दुई टिमबीच भएका ३८ खेलमध्ये स्पेनले १८ जितेको छ, सात बराबरी खेलेको छ भने फ्रान्सले १३ खेल जितेको छ ।
पछिल्ला दुई भेटमा पनि स्पेनले नै जित निकालेको छ । सन् २०२५ को नेसन्स लिग सेमिफाइनलमा ५–४ को रोमाञ्चक जित निकालेको स्पेनले त्यसअघि सन् २०२४ को युरोपियन च्याम्पियनसिपको सेमिफाइनलमा पनि फ्रान्सलाई २–१ ले हराएको थियो ।
