काठमाडौं । नेपाली कांग्रेसले सातवटै प्रदेशमा नेकपा एमालेसँगको सहकार्य तोड्ने तयारी गरेको छ । शीर्ष नेताहरूबीच निरन्तर भएको छलफलमा सहमति जुट्न नसकेपछि एमालेसँगको सहकार्यबाट कांग्रेस पछि हट्ने भएको हो ।
पुरानो समीकरण उपयुक्त नभएकाले अब नयाँ समीकरणमा जाने तयारी भैरहेको एक पदाधिकारीले जानकारी दिए ।
दुई वर्षअघि दुई दलबिच भएको ७ बुँदे सहमतिको पालना हुन नसक्दा प्रदेशको गठबन्धन भत्किएको हो ।
‘सातवटै प्रदेशबाट फिर्ता हुने तयारी भइरहेको छ । पुरानो समीकरण उपयुक्त नभएकाले अब नयाँ समीकरणमा जाने तयारीस्वरुप यस्तो निर्णयमा पुगेका हौँ,’ कांग्रेसका एक पदाधिकारीले भने ।
गठबन्धनको मुख्य घटक नेपाली कांग्रेसले एमालेबाट पूर्वसहमति पालना हुन नसकेको निष्कर्ष निकाल्दै गठबन्धन तोड्न प्रदेश कमिटीहरूलाई अनौपचारिक निर्देशन नै दिइसकेको दिएको छ ।
बुधबार मात्र कर्णाली सरकारबाट कांग्रेसका मन्त्रीहरूले राजीनामा दिए भने सुदूरपश्चिम प्रदेश सरकारमा एमालेका मन्त्रीहरूलाई बर्खास्त गरिएको छ । कर्णालीमा एमालेको र सुदूरपश्चिममा कांग्रेस नेतृत्वको सरकार छ ।
कांग्रेसले नयाँ ढंगले सरकार बनाउन नेकपासँग छलफल पनि गरिरहेको छ । नेकपासँग सहमति जुटेमा प्रदेश सरकारमा बस्ने र सहमति नजुटे प्रतिपक्षमा बस्ने कांग्रेसको तयारी छ ।
मधेश प्रदेशमा कृष्णप्रसाद यादव, बागमती प्रदेशमा इन्द्रबहादुर बानियाँ, गण्डकी प्रदेशमा सुरेन्द्रराज पाण्डे, सुदूरपश्चिम प्रदेशमा कमलवहादुर शाह कांग्रेसका मुख्यमन्त्री छन् । बाँकी तीनवटा कोशी प्रदेशमा हिक्मतकुमार कार्की, लुम्बिनी प्रदेशमा चेतनाथ आचार्य र कर्णाली प्रदेशमा यामलाल कँडेल मुख्यमन्त्री छन् ।
