पेलेले १९५८ को विश्वकप फाइनलमा लगाएको जर्सी ७५ करोडमा बिक्री काठमाडौं । ब्राजिलका महान फूटबलरपेलेले सन् १९५८ को विश्वकप फाइनलमा लगाएको जर्सी ४.९ मिलियन डलर ( ७५ करोड ५६ लाख २९ हजार नेपाली रुपैयाँ ) मा बिक्री भएको छ ।
अमेरिकाको न्यु योर्कमा भएको लिलामीमा पेलेको जर्सी बिकेको हो । यो जर्सी फुटबल इतिहासमा बिक्री भएको दोस्रो सबैभन्दा महँगो हो । यसअघि डिएगो म्याराडोनाले सन् १९८६ को विश्वकपमा इंग्ल्यान्डविरुद्ध ‘ह्यान्ड अफ गड’ गोल गर्दा लगाएको अर्जेन्टिनाको जर्सी ७.१ मिलियन पाउन्डमा बिक्री भएको थियो ।
पेलेको यो जर्सीमा १० वटा बोलपत्र परेको थियो । सन् २००४ मा यही जर्सी १ लाख ५ हजार ६ सय डलरमा बिक्री भएको थियो ।
सन् १९५८ को विश्वकप फाइनलमा १७ वर्षीय पेलेले स्वीडेनविरुद्ध दुई गोल गर्दै ब्राजिललाई पहिलो विश्वकप उपाधि जिताएका थिए । उनको विश्वकप फाइनलमा गोल गर्ने सबैभन्दा कान्छा खेलाडीको कीर्तिमान अझै कायम छ ।
यही लिलामीमा माराडोनाले १९८६ विश्वकपमा लगाएको कप्तानी आर्मब्यान्ड ५ लाख १२ हजार डलरमा, लियोनल मेस्सीले २०१७ मा बार्सिलोनाको पेरिस सेन्ट जर्मेनविरुद्धको ऐतिहासिक पुनरागमन खेलमा लगाएको जर्सी २ लाख १७ हजार ६ सय डलरमा र डेभिड बेकह्यामको इंग्ल्यान्डका लागि ५०औँ खेलमा लगाएको जर्सी ५१ हजार २ सय डलरमा बिक्री भएको बीबीसीले जनाएको छ ।
