काठमाडौं । नेपाल भलिबल लिग (एनभीएल) को फ्रेन्चाइज टिम कर्णाली शिवराजले महानायक राजेश हमाललाई आफ्नो ब्रान्ड एम्बासडरमा नियुक्त गरेको छ ।
शुक्रबार काठमाडौंमा पत्रकार सम्मेलन गरी कर्णाली शिवराजले यो जानकारी दिएको हो । हमाल यसअघि कर्णाली यसबिसका पनि ब्रान्ड एम्बासडर थिए ।
महानायक हमाललाई ब्रान्ड एम्बासडर बनाएको कर्णाली शिवराजले फेस अफ कर्णाली, ग्लोरी अफ कर्णाली र क्विन्स अफ कर्णाली पनि सार्वजनिक गरेको छ । कर्णाली शिवराजको क्विन्स अफ कर्णालीमा राष्ट्रिय महिला भलिबल टिमका सदस्य प्रगति नाथ र कामना विष्ट छन् । प्रगति न्यु डायमन्ड स्पोर्ट्स क्लब र कामना विभागीय टिम नेपाल पुलिस क्लबमा आवद्ध छन् । यस्तै, ग्लोरी अफ कर्णालीका रूपमा कर्णाली यसबिसकी मार्की खेलाडी तथा कप्तान सुमित्रा रेग्मीलाई प्रस्तुत गरिएको छ ।
राष्ट्रिय टिमकी मिडब्लकर सुमित्रा पनि न्यु डायमन्ड स्पोर्ट्स क्लबकै खेलाडी हुन् । उनकै नेतृत्वमा कर्णाली यसबिसले लगातार दुई संस्करण महिला भलिबल लिगको उपाधि जितेको थियो । कर्णाली शिवराजले फेस अफ कर्णालीका रूपमा मिक्स मार्सल आर्ट्सका चर्चित फाइटर रवीन्द्र ढाँटलाई अनुबन्ध गरेको छ ।
‘बझाङ्गी बाघ’का रुपमा समेत परिचित रवीन्द्र व्यावसायिक फाइटका लागि हाल इन्डोनेसियामा छन् । तर रवीन्द्रले भिडियो सन्देश पठाउँदै कर्णाली शिवराजको नेपाल भलिबल लिगमा बलियो उपस्थिति रहने विश्वास व्यक्त गर्दै टिमको सफलताको कामना गरेका थिए । कार्यक्रममा कर्णाली शिवराजले आधिकारिक थिम सङ पनि सार्वजनिक गरेको थियो ।
नेपाल भलिबल लिग भदौ १२ देखि २० सम्म काठमाडौंको त्रिपुरेश्वरस्थित राखेपको कभर्ड हलमा हुँदै छ । पुरुषतर्फ पहिलोपटक हुन लागेको फ्रेन्चाइज भलिबल लिगमा ६ टिमले प्रतिस्पर्धा गर्नेछन् । कर्णाली शिवराजले यसअघि विभागीय टिम नेपाल पुलिस क्लबका पहल गहतराजलाई मार्की खेलाडीका रूपमा घोषणा गरेको थियो । कर्णाली शिवराजको मुख्य प्रशिक्षक विभागीय टिम नेपाल पुलिस क्लबका चन्द्रबहादुर कुँवरलाई बनाइएको छ ।
