काठमाडौं,साउन १५ । नेपाली राष्ट्रिय क्रिकेट टोलीका कप्तान रोहितकुमार पौडेलले नेदरल्याण्ड्स भ्रमणमा चार हार सामना गर्दा समर्थकभन्दा टिम निराश रहेको बताएका छन् ।
आइसिसी विश्वकप लिग–२ अन्तर्गत नेदरल्याण्ड्स र नामिबिया सम्मिलित श्रृङ्खलाको खेलमा नेपाल पराजित भएको थियो । यो हारसँगै विश्वकप लिग–२ को शिर्ष चारमा रहेर एकदिवसीय विश्वकपको छनोटको यात्रा र एकदिवसीय मान्यता संकटमा देखिएको छ ।
शुक्रवार स्वदेश फर्किने क्रममा त्रिभूवन अन्तर्राष्ट्रिय विमानस्थलमा कप्तान रोहितले नेदरल्याण्ड्सको नतिजाबाट समर्थकभन्दा धेरै आफ्नो टोली निराश रहेको बताएका हुन् । भ्रमणमा लिएको आशाअनुरूप खेल्न नसक्नुले निराश रहेको र अब आगामी ओमान श्रृङ्खलामा केन्द्रित हुने रोहितले बताएका छन् ।
उनले त्यहाँको पिचमा नेपालका ब्याटरले राम्रो गर्न नसकेको उल्लेख गरे ।खराब नतिजाको पछाडि पिचमा बुझ्न नसक्नु र ब्याटरले लक्ष्यअनुरुप चुकेको उनको धारणा छ । होम कन्डिसनअनुरूप अवेमा नहुने उनले उल्लेख गरे । नेदरल्याण्ड्सले सर्ट बलमा योजना बनाएको र आफूहरू त्यसमा चुकेको उनी बताउँछन् ।
ब्याटिङसँगै फिल्डिङमा पनि खराब प्रदर्शन गरेको रोहितको भनाइ छ । जुन लेभलमा नेपाल खेलाडीले फिल्डिङमा गर्दै आएको यसपल्ट त्यसमा पूर्णरूपमा चुकेको उनी बताउँछन् । एउटा खेलमा जुन ब्याटरको क्याच छोडिएको थियो उसैले म्यान अफ दी म्याचको प्रदर्शन गरेको उनले बताए । चार वटै खेलमा ब्याटिङ र फिल्डिङमा नेपालको स्तरभन्दा पनि कमजोर प्रदर्शन भएको उनी बताउँछन् ।
यो नतिजाले लिग–२ को अंकतालिकामा धेरै असर पुगेको उल्लेख गर्दै रोहितले आगामी श्रृङ्खलामा राम्रो गर्दै एकदिवसीय मान्यता जोगाउने आशा व्यक्त गरेका छन् । पहिलो खेलमा दीपेन्द्रसिंह ऐरी र आफूले साझेदारी बनाएको अवस्थामा जोगाउन नसकेको उनले उल्लेख गरे ।
अन्तिम खेलमा सन्दीप लामिछानेलाई बाहिर राख्नु चुनौतीपूर्ण निर्णय रहेको उनी बताउँछन् । उनले सानो सानो मुभमेन्टमा आफ्नो टोली चुकेको बताए । भारतजस्तो टोलीलाई पनि युरोपको कन्डिसनका खेल्न गाह्रो भएको रोहितले उल्लेख गरे । –न्युज एजेन्सी नेपाल
