काठमाडौं,साउन १८ । सामान्यतः नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ पत्रकारका प्रश्नको सहजै जवाफ दिन्छन, मन नपरेपनि उनी त्यसलाई देखाउँदैनन र सहजै जवाफ फर्काउँछन, तर आज पत्रकारको एउटा प्रश्नमा नराम्ररी भड्किए । र, जवाफ पनि त्यसै गरी दिए ।
एक विचार गोष्ठीमा सहभागी हुन जाने क्रममा पछ्याउँदै पत्रकार (युट्यूवर)ले उनलाई राजनीतिक सहकार्यबारे प्रश्न सोधेका थिए ।
मोबाइल तेर्स्याउँदै युट्यूबरले ‘तपाई अहिले नयाँ सहकार्य गर्दै हुनुहुन्छ, कस्तो भइराखेको छ ? ’ भनेर सोधे । प्रचण्डले पछाडि नफर्की हिँड्दै छोटो जवाफ दिए, ‘हामी धेरैसँग सहकार्य गर्दैछौं ।’
तर
युट्यूवरले सोधे अनुसारको जवाफ नपाएपछि थप पछ्याए । पछ्याउँदै उनले फेरि सोधे– ‘तर तपाईंले कहिले कांग्रेस, कहिले एमालेसँग सहकार्य गर्नुहुन्छ, यसको विषयमा भन्दिनुस न ।’
प्रचण्ड नसुनेझैं गरेर अघि बढे । तर युट्यूवरले छोड्ने छाँट देखाएनन उनी प्रचण्डको पछि लागेर हलभित्रै पसे र फेरि मोबाईल अगाडि सार्दै सोधे – प्रचण्डजी, सुन्नुस न । जहिले पनि तपाई एमाले, कांग्रेस, माओवादीमा जानुहुन्छ । तपाईंको स्थिरता चाहीँ कहले हुन्छ प्रचण्डजी ? ’
यसपाली भने प्रचण्ड आक्रोशित देखिए । उनी उत्तेजित हुँदै फनक्क पछाडि फर्किए र एक शब्दमा जवाफ दिए– मरेपछि ।'
