काठमाडौं,साउन १८ । नेकपा (एमाले)का महासचिव शंकर पोख्रेलले तत्कालीन नेपाल कम्युनिष्ट पार्टी (नेकपा)को गठन र विघटनको गहिरो समीक्षा नगरी वामपन्थी एकता गरिए त्यसले कुनै सार्थकता नपाउने बताएका छन् ।
सोमवार २४ औँ बोत्ले स्मृति दिवसको अवसरमा काठमाडौँमा आयोजित कार्यक्रममा बोल्दै उनले तत्कालीन नेकपाको गठन र विघटनले नेपालको वामपन्थी आन्दोलनलाई कमजोर बनाएकाले त्यसको समिक्षा हुनैपर्ने बताए ।
महासचिव पोखरेलले कम्युनिष्ट दलहरूले नेताहरूका टाउका नभई कार्यकर्ताको भावना जोड्ने कुराको सामथ्र्य राख्न सक्नुपर्ने बताए । उनले नेताहरूबीचको सहमतिलाई मात्रै आधार बनाएर नभई कार्यकर्ताको भावना, नीति र साझा कार्ययोजनामा आधारित एकताले मात्रै आन्दोलनलाई पुनर्जीवित गर्न सक्ने बताए ।
‘नेकपाको गठन र विघटन नेपालको वामपन्थी आन्दोलनलाई कमजोर बनाउने एउटा महत्वपूर्ण परिघटना बन्यो । जसले नेपालको वामपन्थी आन्दोलनलाई कमजोर बनाएको छ । यसको समीक्षा नगरीकन फेरि नेताहरूका टाउका जोडेर वाम एकता र सफलता प्राप्त गरिन्छ भन्ने खालको मान्यता बनायौँ भने त्यसको कुनै सार्थकता हुँदैन । त्यसैले नेताहरूका टाउका होइन कार्यकर्ताको भावना जोड्ने कुराको सामथ्र्य राख्न सक्नुपर्दछ । त्यसले नै वामपन्थी आन्दोलनलाई एकताबद्ध गर्दछ ।' उनले भने ।
उनले नेपालको कम्युनिष्ट आन्दोलन कमजोर हुनुको मुख्य कारण नेताहरुबीचको झगडा भएको टिप्पणी गरे । उनले अगाडि भने, आजको वामपन्थी आन्दोलन कमजोर हुनुका पछाडि नेताहरूका बीचको झगडाको हो । त्यसलाई बलियो बनाउने हो भने नेतालाई केन्द्रित गरेर होइन, नीतिलाई केन्द्रित गरिकन, कार्ययोजनालाई केन्द्रित गरिकन वामपन्थी आन्दोलनलाई एकताबद्ध गर्ने कुरामा सोच्ने हो भने मात्र आन्दोलनको पुनर्जागरण हुन सक्दछ भन्ने कुरा हामीले बुझ्नुपर्दछ ।’
मुलुकको लोकतान्त्रिक व्यवस्थाको रक्षाका लागि लोकतन्त्र स्थापनाका लागि लडेका राजनीतिक शक्तिहरू एक ठाउँमा उभिनुको विकल्प नरहेको महासचिव पोखरेलको भनाइ छ । उनले अहिले लोकतान्त्रिक व्यवस्थाका लागि लडेका राजनीतिक दलहरूसँगै लोकतान्त्रिक व्यवस्था समेत संकटमा रहेको बताए । उनले जेन जेड आन्दोलनको सन्दर्भमा राजनीतिक दलहरूका सोचहरू विभाजित हुँदा मुलुक दुर्घटना उन्मुख रहेको बताए ।
