काठमाडौं,साउन २५ । गृहमन्त्री सुधन गुरुङले उद्योग मन्त्री गौरी यादवसहित मधेश प्रदेशका सांसदहरूसँग छलफल गरेका छन् ।
सोमवार सिंहदरबारस्थित गृह मन्त्रालयमा उनले मधेशमा हालै घटेको घटनालगायत समसामयिक विषयमा मधेश प्रदेशका सबै दलका सांसदहरूसँग छलफल गरेका हुन् ।
राष्ट्रिय स्वतन्त्र पार्टी (रास्वपा)की सांसद नीतिमा भण्डारीले छलफल मधेश प्रदेशमा पटक-पटक हुने गरेको धार्मिक तथा साम्प्रदायिक तनावको दीर्घकालीन हल कसरी गर्न सकिन्छ भन्ने विषयमा केन्द्रित रहेको बताइन् । उनका अनुसार छलफलमा गृहमन्त्री गुरुङले मधेशमा उत्पन्न हुने सामुदायिक तनावको हल कसरी गर्न सकिन्छ ? भन्नेबारे सांसदहरूसँग सुझाव लिएका छन् । सांसद भण्डारीले छलफलमा सांसदहरू हालै सुनसरी, सिरहासहित मधेशका केही जिल्लामा घटेको घटना साम्य पार्ने क्रममा भएको प्रशासनिक कमजोरी औँल्याउँदै सुरक्षा रणनीतिमा सुधार गर्नुपर्ने धारणा राखेको बताइन् ।
उनले भनिन्, ‘गृहमन्त्रीज्यूले मधेश प्रदेशमा हुने गरेका धार्मिक तथा साम्प्रदायिक तनावको दीर्घकालिन रुपमा कसरी हल गर्न सकिन्छ रु तपाईँहरूको सुझाव चाहियो भन्नुभयो । उहाँले अब आइन्दा यस्तो घटना नहोस् भनेर दीर्घकालीन सोलुसनमा जानुपर्छ भन्नुभयो । अनि भिड नियन्त्रणको क्रममा प्रहरी र स्थानीय प्रशासनबाट भएका कमजोरी र आउने दिनमा ध्यान दिनुपर्ने कुराहरूको विषयमा हामीहरूले सुझाव दिइरहेकै छौँ ।’
सुनसरीको तप्तानगञ्जसहित मधेशी जिल्लामा हिन्दु र मुस्लिम समूदायबीच बढेको तनाव नियन्त्रण गर्ने क्रममा प्रहरीको गोली लागेर ३ जनाको मृत्यु भएको थियो । सोही घटनामा अन्य केही घाइते भएका थिए ।
