काठमाडौं, मंसिर ३ । नेकपा एमालेका अध्यक्ष केपी शर्मा ओलीले गगन थापा नेतृत्वको नेपाली कांग्रेसलाई प्रतिपक्षी दल मान्न अस्वीकार गरेका छन् ।
एमालेको राष्ट्रिय कार्यकर्ता भेलालाई सम्बोधन गर्दै ओलीले वास्तविकरुपमा अहिले कांग्रेस नभई एमालेनै प्रतिपक्ष भएको दाबी गरे । उनले गगन नेतृत्वको कांग्रेस र सरकारबिच साँठगाँठ रहेको दाबी समेत गरे । सरकारकै संरक्षणमा कांग्रेस बसेको उनको आरोप छ ।
'अहिले पनि देशमा एउटा सत्तापक्ष छ, कति दिनको हो ? एउटा प्रतिपक्ष छ मुख्यरुपमा, अस्तित्वमा रहेको प्रतिपक्ष नेकपा एमाले हो ।'ओलीले भने, अब सरकारको पखेटा मुनि रहेर, सरकारका पखेटामुनि जोगिएर प्रतिपक्ष हुँ भन्न नेकपा एमाले चाहँदैन । पखेटामा ओत लागेर होइन, प्रतिपक्षको भूमिकामा एमाले रहन्छ । '



